තෙල් බේත් වෙළෙන්දා

“මිනිසාට වගේම සතුන්ටත් ගැලපෙනවා. ඕනෑම යුගයක හෝ රටක මෙතෙක් සිදු කරන ලද වඩා ආශ්චර්‍යමත්ම සුව කිරීමේ සොයාගැනීම. මාංශ පේශි, පටල සහ ඇට මිඳුලු විනිවිද යන, පරම්පරා දෙකක බුද්ධිමත් මිනිසුන් මවිතයට පත් කල බලයකින්, වේදනාව පලවා හරින, ලිනමන්ට් එක.”
- 'අව්‍යාජ' සර්ප තෙල් බෝතලයක ලේබලය-

සියවස් ගණනාවක් තිස්සේ, දේශීය චීන වෛද්‍ය විද්‍යාවේ පිළියමක් ලෙස හන්දිපත් රුදාව වැනි වේදනාවන්ට ප්‍රතිකාර කිරීම සඳහා, සර්ප තෙල්  භාවිතා විය.ට්‍රාන්ස් කොන්ටිනෙන්ටල් දුම්රිය මාර්ගයේ වැඩ කිරීම සඳහා එක්සත් ජනපදයට පැමිණි දහස් ගණන් චීන කම්කරුවන් සර්ප තෙල් ඇතුළු ඔවුන්ගේ සාම්ප්‍රදායික ඖෂධ ඔවුන් සමඟ ගෙන ආහ. දැවිල්ල අඩු කිරීමට උපකාරී වන ඔමේගා-3 අම්ල වලින් පොහොසත් චීන ජල සර්පයාගේ(දියබරියා විය හැක) තෙල් වලින් සාදන ලද, එහි මුල් ස්වරූපයෙන් සර්ප තෙල් සැබවින්ම ප්‍රතිඵලදායක විය. විශේෂයෙන් හන්දිපත් රුදාව සඳහා ප්‍රතිකාර කිරීමට භාවිතා කළ විට. දිගු වෙහෙසකර දිනක් වැඩ කිරීමෙන් පසු, සන්ධිවල තෙල් ආලේප කළ කම්කරුවන්ට,සැබවින්ම යම් සහනයක් අත්විඳීමට හැකි විය.

19 වන සියවසේ ඇමරිකාවේදී, සර්ප තෙල් සාමාන්‍යයෙන් "සර්ව විශාධී තෛලයක්" ලෙස සැලකුනි. ඒ යුගයේ හුදීජනයා අත මුදල් හිඟ විය. රටේ වෛද්‍යවරුන් හිඟ විය, ලෙඩින් දුකින් පෙලුන පුද්ගලයින් බොහෝ විට මේ "නවතම ප්‍රතිකාරය' මිලදී ගැනීමේ අවස්ථාව ලබා ගත්හ. 

අවසානයේදී, චීන කම්කරුවන් තම සර්ප තෙල් ඇමරිකානු සගයන් කිහිප දෙනෙකු සමඟ බෙදා ගැනීමට පටන් ගත් අතර, ඔවුන් ප්‍රතිඵල ගැන මවිතයට පත්වී, 'සියල්ල සුව කරන' දේශීය ආදේශකයක් සාදා විකිණීමට කැමති විය. ගැටලුව වූයේ එක්සත් ජනපදයේ චීන දියබරියන් නොමැති වීමයි. 

තමන්ගේම ව්‍යාජ අමෘතයක් සාදා ගැනීමෙන් ඉක්මනින් පොහොසත් වී "ගේමක් ගසා ගොඩයෑමට",  ඇමරිකන් අයියලා දියබරියා වෙනුවට රැට්ල්ස්නේක් ආදේශ කලහ. රැට්ල්ස්නේක් සර්පයාට, දියබරියන්ගේ ඖෂධීය ගුණ නොතිබීම වැදගත් නොවීය. සාර්ථකත්වය සහතික කරන ලද්දේ මුඛරි කතාවෙන් ගනුදෙනුකරුවන් වශී කර ගැනීමෙනි. 

බොහෝ සර්ප තෙල්වල ඊයම්, රසදිය හෝ ආසනික් වැනි විෂ අඩංගු වූ අතර සමහර විට ඒ තුනම අඩංගු විය. අනෙක් ඒවාට අබ තෙල්, පයින් තෙල්, වින්ටර්ග්‍රීන් තෙල්, කපුරු හෝ පෙට්‍රෝලියම් යොදා ගෙන තිබුණි. මෙම මිශ්‍රණ සෑම එකක්ම අප්‍රසන්න රසයක් ඇති බව උපකල්පනය කල හැක. එසේ වුවද, ඒවායේ රසය බොහෝ විට අබිං,  කොකේන් හෝ ධාන්‍ය මධ්‍යසාරවලින් යටපත් කරවන ලදී." වෑම්,බෑම් තැන්ක් යූ මෑම්" සහ "ඩිෂුම්, ඩිෂුම් හුචස්" ජීවන රටාවක් අනුගමනය කල, "ඇමරිකන් වයිල්ඩ් වෙස්ට්" පුරවැසියන්ගේ කෙටි ජීවිත වලට, මේ විෂ ඒ හැටි බලපෑමක් කලාද යන්නත් විස්වාස නැත. 

නිදන්ගත වේදනා, හිසරදයේ සිට "කාන්තා රෝග" සහ වකුගඩු ආබාධ දක්වා සුව කිරීමට

පොරොන්දු වෙමින්, බොහෝ විට පුවත්පත්වල සර්ප තෙල්  දැන්වීම් පලකරන ලදී.  බොහෝ විට මේ සර්ප තෙල් අලෙවිකරු වෛද්‍යවරයෙකු ලෙස පෙනී සිට ඇත. "වෛද්‍යවරයා" සමූහයක් ඉදිරිපිට  හාස්‍යජනක නිරූපණක් රඟ දක්වා, අවසන "තෙල" සාර්ථකව අලෙවි කරන ලදී.  ප්‍රේක්ෂකයින් අතර සිටින තැරැව්කරුවකු, කලින් සැලසුම් කළ මොහොතක, සර්ප තෙල් ඔහුගේ සියලු ලෙඩ සනීප කල බවට සහතික වී ඇත. සැක නොකළ මහජනතාව වංචාකරුවන්ගේ භාණ්ඩ මිලදී ගත් පසු, නගරවාසීන් ඔවුන්ගේ නව සර්ප තෙල්වල නිෂ්ඵල බව සොයා ගැනීමට පෙර 'වෛද්‍යවරයා' සහ තැරැව්කරු යන දෙදෙනාම ඉක්මනින් වාෂ්ප වීම සුලභ සිද්ධියක් විය.

අද වහරේ හැටියට "සර්ප තෙල් වෙළෙන්දා" යනු බොහෝ විට, රැවටිලිකාර, අලෙවිකරණය අතිශයෝක්තියට නැංවූ , වටිනාකමක් නැති හෝ වංචනික නිෂ්පාදන ප්‍රවර්ධනය කරන කෙනෙකුට කියන අපහාසාත්මක යෙදුමක් වුවද, නූතන "සර්ප තෙල් වෙළෙන්දා" අදද වෙනත් අයුරකින් යෙහෙන් වැජඹේ.

බැකිසි බකුසානේ

කරවැල් මහ කොකානේ

දිය ගැරඞියානේ 

රකිව් දුම්බර අල විදානේ

මූලාශ්‍රය: Snake oil salesmen By  Nick Brumby

(ඡායාරූප සහ වීඩියෝ අන්තර්ජාලයෙනි)